కవిత పిటిషన్ డిస్మిస్.. ఏం జరగబోతోంది ?

ఇదే సందర్భంగా ఈడీకి సుప్రీంకోర్టు నోటీసులు జారీ చేసింది. పిటిషన్‌లో కవిత లేవనెత్తిన ప్రశ్నలకు 6 వారాల్లోగా సమాధానాలు ఇవ్వాలని తెలిపింది. అలాగే మహిళ కాబట్టి వీలైనంత తొందరగా విచారణ ముగించాలని ట్రయల్ కోర్టుకు సూచించింది.

ఇక్కడ విషయం ఏమిటంటే ఈడీ తనను అరెస్టు చేయకుండా కవిత చాలా ప్రయత్నాలు చేసుకున్నారు. దాదాపు ఏడాది క్రితం రెండు రోజులు విచారణ నిమిత్తం ఢిల్లీలోని ఈడీ ఆఫీసుకు కవిత వెళ్ళారు. ఆ తర్వాత నుండి ఈడీ ఎన్ని నోటీసులు ఇచ్చినా కవిత విచారణకు హాజరు కాలేదు.

విచారణకు హాజరుకాకపోగా తాను మహిళలను కాబట్టి ఆఫీసుకు పిలిపించి ఈడీ తనను విచారించకూడదంటూ సుప్రీంకోర్టులో పిటిషన్ వేశారు. ఒకవైపు పిటిషన్‌పై విచారణ జరుగుతుండగానే కవితను ఈడీ హైదరాబాద్‌లోని ఆమె నివాసంలో అరెస్టు చేసి అదే రోజున ఢిల్లీకి తరలించింది. లిక్కర్ స్కాం అని కాకుండా మనీల్యాండరింగ్ ఆరోపణలపై కవితను అరెస్టు చేసినట్లు ఈడీ తెలిపింది. దాంతో కవిత మరోసారి సుప్రీంకోర్టులో కేసు ఫైల్ చేశారు. హైదరాబాద్‌లో కవితను అరెస్టుచేసి ఢిల్లీకి తరలించటంలో ఈడీకి చట్టబద్దమైన అధికారాలున్నాయని కోర్టు స్పష్టంగా తేల్చేసింది. అన్ని నిబంధనలను పాటించిన తర్వాతే కవితను ఈడీ అరెస్టు చేసినట్లు ఈడీ కోర్టు అభిప్రాయపడింది.

దాంతో మళ్ళీ మరో పిటిషన్ వేయటమే కాకుండా తాను మహిళను కాబట్టి ఆఫీసులో ఈడీ అరెస్టు చేయడానికి లేదని కవిత తరపు న్యాయవాది వాదించారు. ఆ పిటిషన్‌ను సుప్రీంకోర్టు డిస్మిస్ చేసేసింది. ట్రయల్ కోర్టులోనే తన వాదనలను వినిపించాలని కవితకు చెప్పింది. దాంతో కవిత ట్రైల్ కోర్టులో పిటిషన్ వేయడానికి రెడీ అవుతున్నారు. పోయిన అసెంబ్లీ ఎన్నికల్లో లిక్కర్ స్కాంలో కవిత పాత్ర, ఈడీ అరెస్టు చేయకటపోవడం లాంటి అంశాలు కీలకంగా పనిచేశాయి. కవితను ఈడీ అరెస్టు చేయకపోవడానికి కారణం బీజేపీ, బీఆర్ఎస్ మధ్య లోపాయికారి ఒప్పందాలుండటమే అని కాంగ్రెస్ నేతలు పదేపదే ప్రచారం చేశారు. దాన్ని జనాలు కూడా నమ్మారు. బీఆర్ఎస్ ఓటమికి దారి తీసిన అనేక కారణాల్లో బీఆర్ఎస్, బీజేపీ ఒకటే అని ప్రజలు నమ్మడమే అని స్వయంగా బీఆర్ఎస్ నేతలు పార్టీ అంతర్గత విశ్లేషణల్లో అభిప్రాయపడ్డారు.

అసెంబ్లీ ఎన్నికలకు ముందు కవితను అరెస్టు చేయకుండా బీఆర్ఎస్, బీజేపీ దెబ్బతిన్నాయి. ఇపుడేమో పార్లమెంటు ఎన్నికలకు ముందు జరిగిన కవిత అరెస్టు రాబోయే ఎన్నికల్లో ఎలాంటి మలుపులు తీసుకుంటుందో చూడాలి. కవిత అరెస్టు తాలూకు సానుభూతిని క్యాష్ చేసుకోవాలని బీఆర్ఎస్ ప్రయత్నిస్తోంది. కవిత అరెస్టు కారణంగా బీఆర్ఎస్, బీజేపీ మధ్య ఎలాంటి ఒప్పందాలు లేవని బీజేపీ చెబుతోంది. పైకి ఎన్ని చెప్పినా రెండు పార్టీలు ఒకటే అని కాంగ్రెస్ తన ఆరోపణలను పెంచేస్తోంది. చివరకు ఏమవుతుందో చూడాల్సిందే.