ట్రంప్ బయటికొచ్చి ఇప్పటికి 16 రోజులు, ఎలా ఉన్నాడో, ఏమో!
జనవరిలో పదవీ స్వీకారం చేసినప్పటి నుంచి ఇంతకాలం బయట కనబడక పోవడం ఇదే మొదటి సారి.;
By : The Federal
Update: 2025-09-01 10:32 GMT
అమెరికా అధ్యక్షుడు డొనాల్డ్ ట్రంప్ ఆరోగ్యంపై ఓ జోరుగు ఊహాగానాలు సాగుతున్నాయి. మరోపక్క ఆయన బాగానే ఉన్నాడంటూ అధికార మీడియా ఊదరగొడుతోంది.
అమెరికా అధ్యక్షుడు ట్రంప్ బయటకనబడి ఇప్పటికి 16 రోజులు. వాషింగ్టన్ డీసీలోని తన నివాసాన్ని దాటి ఎక్కడికీ పోలేదని కొందరంటుంటే, ఆయనెక్కడో ప్రైవేటు ప్లేస్ లో ఉన్నాడంటూ మరికొందరు చెబుతున్నారు. జనవరిలో పదవీ స్వీకారం చేసినప్పటి నుంచి ఇంతకాలం బయట కనబడక పోవడం ఇదే మొదటి సారి.
ఇదే సమయంలో, ట్రంప్ వరుసగా 6 రోజుల పాటు పెద్దగా ఎలాంటి ప్రజా కార్యక్రమాల్లో పాల్గొనలేదు. ఆయన కమ్యూనికేషన్‌ను కేవలం సోషల్ మీడియా పోస్టులకు పరిమితం చేశారు. దీంతో ఆయన ఆరోగ్యంపై అనుమానాలు మరింత పెరిగాయి.
ట్రంప్ చివరిసారి వాషింగ్టన్ బయటకి వెళ్లింది ఆగస్టు 15, 16 తేదీల్లో.. రష్యా అధ్యక్షుడు వ్లాదిమిర్ పుతిన్‌తో అలాస్కాలో జరిగిన సమ్మిట్ లో కనిపించారు. ఆగస్టు 3న న్యూజెర్సీ బెడ్‌మినిస్టర్‌లోని ట్రంప్ నేషనల్ గోల్ఫ్ క్లబ్ నుంచి బయలుదేరిన తరువాత పుతిన్ సమ్మిట్ వరకు చాలా గ్యాప్‌ ఉంది.
సరిగ్గా ఈ సమయంలో ట్రంప్ ఆరోగ్యంపై పుకార్లు వచ్చాయి.
ప్రస్తుతం ట్రంప్ వారాంతాల్లో వాషింగ్టన్ డీసీ సమీపంలోని వర్జీనియాలోని లౌడౌన్ కౌంటీలో ఉన్న ట్రంప్ నేషనల్ గోల్ఫ్ క్లబ్‌లోనే గడుపుతున్నారు. ఇది వైట్ హౌస్ నుంచి కేవలం 40 నిమిషాల డ్రైవ్ దూరం మాత్రమే.
ఇటీవల ట్రంప్ పబ్లిక్‌గా కనిపించకపోవడం, చేతులపై మచ్చలతో ఉన్న ఫోటోలు బయటకు రావడం ఆరోగ్యంపై ఊహాగానాలకు కారణమైంది. ఈ నెల ప్రారంభంలో వైట్ హౌస్ ప్రకటనలో, అధ్యక్షుడికి “క్రానిక్ వెనస్ ఇన్‌సఫిషెన్సీ” (కాలిలో వాపు వచ్చే సమస్య) ఉన్నట్లు తెలిపారు. ఇది సాధారణంగా హానికరం కాకపోయినా, కొన్నిసార్లు సమస్యలు కలిగించవచ్చు.
ట్రంప్ వ్యక్తిగత వైద్యుడు డాక్టర్ షాన్ బార్బాబెల్లా, ఆ మచ్చలకు కారణం “తరచుగా చేతులు కలపడం వల్ల చర్మం స్వల్పంగా దెబ్బతినడం, అలాగే ఆస్పిరిన్ వాడకం” అని చెప్పారు. ఆయన ఇంకా జోడిస్తూ, “అధ్యక్షుడు ఆరోగ్యంగా ఉన్నారు” అన్నారు.
ఒక డెర్మటాలజిస్ట్ డస్టిన్ పోర్టెలా కూడా ఈ వివరణను సమర్థించారు. ఆయన యూట్యూబ్ వీడియోలో మాట్లాడుతూ, “చేతులు కలపడం వల్లే ఈ మచ్చలు వచ్చి ఉండవచ్చు.. వృద్ధులలో ఇలాంటివి సాధారణం. సింపుల్ ఎక్స్‌ప్లనేషన్‌నే ఎక్కువసార్లు నమ్మదగినదిగా చూడాలి. కాబట్టి వైట్ హౌస్ ఇచ్చిన వివరణ సరైనదే అనిపిస్తోంది” అన్నారు.
వైట్ హౌస్ ప్రెస్ సెక్రటరీ క్యారలైన్ లీవిట్ కూడా ట్రంప్ ఆరోగ్యాన్ని కాపాడుతూ, “ప్రెసిడెంట్ ట్రంప్ ప్రజలతో దగ్గరగా కలిసే నాయకుడు. చరిత్రలో ఏ ఇతర అధ్యక్షుడికన్నా ఎక్కువ మంది అమెరికన్లను కలుస్తూ, వారి చేతులు కలుపుతూ ఉంటారు. ఆయన కట్టుబాటు అచంచలమైనది. ప్రతిరోజూ దాన్ని నిరూపిస్తున్నారు” అని పేర్కొన్నారు.
ఈనేపథ్యంలో అమెరికా అధ్యక్షుడు సోషల్‌మీడియా ‘ట్రూత్‌’ వేదికగా చేసిన పోస్టు వైరల్‌గా మారింది. ట్రంప్ అనారోగ్యం గురించి ఓ కన్జర్వేటివ్‌ కామెంటేటర్‌ చేసిన పోస్ట్‌కు స్పందిస్తూ.. తన జీవితంలో ఎన్నడూ ఇంత బెటర్‌గా అనిపించలేదంటూ రాసుకొచ్చారు. అదే పోస్టులో వాషింగ్టన్ డీసీలో నేరాల సంఖ్య చాలా తగ్గిపోయిందని..క్రైం ఫ్రీ జోన్‌గా మారిందని తెలిపారు.