మసీద్, ప్రవక్తలపై ఇబ్బందికర ప్రకటనలు: ముస్లిం పర్సనల్ లా బోర్డు ఆందోళన

భారత్ లో ప్రతిరోజు ఏదో ఒక మసీదు వద్ద ఆందోళనలు జరుగుతున్నాయని, తరువాత కోర్టుల నుంచి సర్వే ఉత్తర్వులు వస్తున్నాయని ఆల్ ఇండియా ముస్లిం పర్సనల్ లా బోర్డు ఆందోళన వ్యక్తం చేసింది. మహ్మద్ ప్రవక్త గురించి దేశంలో ఇబ్బందికర ప్రకటనలు ఇస్తున్నారని, ఇది ముస్లిం సమాజం అంగీకరించదని పేర్కొన్నారు.

బెంగుళూరులో ఆదివారం (నవంబర్ 24) జరిగిన రెండు రోజుల సదస్సులో ఆల్ ఇండియా ముస్లిం పర్సనల్ లా బోర్డ్ (AIMPLB) అభిప్రాయ పడింది. అలాగే వక్ప్ సవరణ సవరణ బిల్లు "ప్రజాస్వామ్య విరుద్ధం, రాజ్యాంగ విరుద్ధం" అని పేర్కొంది. AIMPLB ఆదివారం నాడు వక్ఫ్ (సవరణ) బిల్లు, యూనిఫాం సివిల్ కోడ్ (UCC) సహా పలు అంశాలపై చర్చించింది.

AIMPLB అధికార ప్రతినిధి సయ్యద్ ఖాసిం రసూల్ ANI తో మాట్లాడుతూ, “సమావేశంలో, మేము మా సంఘం ఎదుర్కొంటున్న వివిధ సమస్యలను ప్రస్తావించాము. మేము వక్ఫ్ (సవరణ) బిల్లు 2024 గురించి చర్చించాము, దానిపై మా వ్యతిరేకతను వివరిస్తూ, మా తదుపరి చర్యలను వివరించాము.

ఉత్తరాఖండ్‌లో ఇప్పటికే అమలులోకి వచ్చిన యూనిఫాం సివిల్ కోడ్ గురించి కూడా మేము మాట్లాడాము. ఈ చట్టాన్ని హైకోర్టులో సవాలు చేయాలని నిర్ణయించుకున్నామని చెప్పారు. దేశంలో యూసీసీ అమలు గురించి కూడా చర్చించామని వివరించారు.

ద్వేషపూరిత ప్రసంగాలు

దేశవ్యాప్తంగా విద్వేషపూరిత ప్రసంగాలు పెరగడంపై రసూల్ ఆందోళన వ్యక్తం చేశారు. "మేము వక్ఫ్ (సవరణ) బిల్లు, 2024కి వ్యతిరేకంగా అందుబాటులో ఉన్న అన్ని చట్టపరమైన, రాజ్యాంగ నిబంధనలను ఉపయోగిస్తాము. నేడు, వారంతా వక్ఫ్, UCCని లక్ష్యంగా చేసుకుంటున్నారు.

రేపు, వారు గురుద్వారా ప్రబంధక్ కమిటీని లేదా హిందూ ఎండోమెంట్ చట్టాన్ని లక్ష్యంగా చేసుకోవచ్చు. వక్ఫ్ (సవరణ) బిల్లు, 2024 ప్రజాస్వామ్య విరుద్ధం, రాజ్యాంగ విరుద్ధం, అశాస్త్రీయమైనది" అని రసూల్ అన్నారు.

బిల్లు

వక్ఫ్ (సవరణ) బిల్లు, 2024 కఠినమైన ఆడిట్‌లు, పారదర్శకత, డిజిటలైజేషన్, చట్టవిరుద్ధంగా ఆక్రమించిన ఆస్తులను తిరిగి పొందేందుకు చట్టపరమైన విధానాలతో సహా అనేక సంస్కరణలను అమలు చేయడానికి ప్రయత్నిస్తుంది. పార్లమెంటరీ ప్రక్రియలో భాగంగా, జాయింట్ పార్లమెంటరీ కమిటీ (జెపిసి) న్యాయ నిపుణులు, వక్ఫ్ బోర్డు సభ్యులు, ప్రభుత్వ అధికారులు, ముస్లిం సమాజానికి చెందిన ప్రతినిధులతో సమావేశమై వివిధ సమస్యలపై ఇన్‌పుట్‌లను సేకరిస్తోంది. ఈ శీతాకాల సమావేశాల్లో బిల్లును సభలో ప్రవేశపెట్టి ఆమోదించడానికి ఎన్డీఏ సిద్ధంగా ఉంది.