Upasana | తెలంగాణ స్పోర్ట్స్ హబ్ కో ఛైర్మన్‌గా మెగా కోడలు

మెగా కోడలు ఉపాసన కామినేనికి తెలంగాణ ప్రభుత్వం కీలక బాధ్యతలు అప్పగించింది. రాష్ట్రంలో క్రీడా రంగాన్ని అభివృద్ధి చేయడమే లక్ష్యంగా తెలంగాణ ప్రభుత్వం అడుగులు వేస్తోంది. ఇందులో భాగంగానే తాజాగా స్టేట్ స్పోర్ట్స్ పాలసీని కూడా సీఎం రేవంత్ రెడ్డి ఆవిష్కరించారు. ఈ నేపథ్యంలోనే ‘తెలంగాణ స్పోర్ట్స్ హబ్’ను ప్రారంభించింది. ఈ సంస్థకు ఛైర్మన్‌ సంజీయ్ గోయెంకాను నియమించగా, కో ఛైర్మన్‌గా మెగా కోడలు ఉపాసన కామినేనిని నియమించింది. ఈ మేరకు అధికారిక ఉత్తర్వులు జారీ చేసింది. ఇదే విషయాన్ని ఉపాసన కూడా తన ఎక్స్(ట్విట్టర్) వేదికగా వెల్లడించారు. తనకు తెలంగాణ ప్రభుత్వం ఇచ్చిన గౌరవంపై ఆమె సంతోషం వ్యక్తం చేశారు. ఈ సందర్భంగా సీఎం రేవంత్ రెడ్డి ధన్యవాదాలు తెలిపారు.

‘‘తెలంగాణ స్పోర్ట్స్ హబ్‌ కో ఛైర్మన్‌గా నియామకం కావడం సంతోషంగా ఉంది. సంజీయ్ గోయెంకాతో కలిసి పనిచేయడం కోసం ఎదురుచూస్తున్నారు. గ్లోబల్ స్పోర్ట్స్‌‌లో తెలంగాణను నిలిపేదిశగా అడుగులు వేస్తాం. పబ్లిక్-ప్రైవేట్ భాగస్వామ్యాన్ని నెలకొల్పడంపై వైపు ఇదొక పెద్ద అడుగనే చెప్పాలి. తెలంగాణలో స్పోర్ట్స్ ఎకో సిస్టమ్‌ ఏర్పాటుకు ఈ పరిణామం ఎంతగానో కలిసొస్తుంది’’ అని ఉపాసన పేర్కొన్నారు.