AP సీఎం చంద్రబాబుకి బీఆర్ఎస్ నేత స్పెషల్ రిక్వెస్ట్
నీట్ కుంభకోణంపై పార్లమెంటులో చర్చ జరగాలని వినోద్‌కుమార్‌ డిమాండ్ చేశారు. ఈ అంశంపై స్పందించాలని ఎన్‌డీఏ మిత్రపక్షం, ఏపీ సీఎం చంద్రబాబును కోరారు.
నేషనల్ ఎలిజిబిలిటీ కమ్ ఎంట్రన్స్ టెస్ట్ (నీట్) నుంచి వైదొలిగి స్వతంత్రంగా మెడికల్ అడ్మిషన్లు నిర్వహించేందుకు సుప్రీంకోర్టులో పిటిషన్ దాఖలు చేయాలని సీనియర్ బీఆర్ఎస్ నేత, మాజీ ఎంపీ వినోద్ కుమార్ రాష్ట్ర ప్రభుత్వాన్ని కోరారు. ఈ విషయంలో ముఖ్యమంత్రి రేవంత్‌రెడ్డి వెంటనే చర్యలు తీసుకోవాలని కోరారు.
సోమవారం తెలంగాణ భవన్‌లో మీడియా ప్రతినిధులతో మాట్లాడిన వినోద్... నీట్-యూజీ స్కామ్ దేశంలోనే అతిపెద్దదని, కోట్లాది రూపాయలు చేతులు మారాయని ఆరోపించారు. తెలంగాణలో గొర్రెల పంపిణీ పథకంపై కూడా విచారణకు ఎన్‌ఫోర్స్‌మెంట్ డైరెక్టరేట్ (ఈడీ)ని మోహరించిన అధికార బీజేపీ... ఎన్డీయే పాలిత రాష్ట్రాల్లో 24 లక్షల మంది విద్యార్థులు, వారి తల్లిదండ్రుల జీవితాలపై దుష్ప్రభావం చూపుతున్న ప్రశ్నపత్రం లీకేజీని పట్టించుకోలేదని విమర్శించారు.
“ఈ సమస్యపై ఈడీ ఎందుకు మౌనంగా ఉంది? ఈడీ ఏమి చేస్తుందో ప్రశ్నించడానికి ప్రజలు సుప్రీంకోర్టును ఆశ్రయించవలసి వచ్చింది” అని ఆయన ప్రశ్నించారు. “తెలంగాణలో పదవ తరగతి పరీక్ష పేపర్ లీకేజీ అయిందని ఆరోపించిన కేంద్ర మంత్రి బండి సంజయ్ విద్యార్థులకు ఒక్కొక్కరికి లక్ష రూపాయలు చెల్లించాలని డిమాండ్ చేశారు. నీట్ 24 లక్షల మంది రాశారు.. వారందరికి లక్ష రూపాయల పరిహారం ఇవ్వాలని బండి ఎందుకు డిమాండ్ చేయరు అని నిలదీశారు.
ఉత్తర భారత రాష్ట్రాల విద్యార్థులు తెలంగాణలోని అత్యున్నత వైద్య కళాశాలల్లో సీట్లు పొందుతున్నారని, స్థానిక విద్యార్థులు వెనుకబడి ఉన్నారని, వ్యవస్థాగత అవినీతిని సూచిస్తున్నట్లు ఆయన పేర్కొన్నారు. "డబ్బు ఉన్నవారు పరీక్ష పేపర్లు కొంటున్నారు, అయినప్పటికీ బిజెపి తమది సుపరిపాలన అని చెబుతోంది" అని విమర్శించారు.
ప్రస్తుతం జరుగుతున్న సమావేశాల్లో నీట్ కుంభకోణంపై పార్లమెంటులో చర్చ జరగాలని వినోద్‌కుమార్‌ డిమాండ్ చేశారు. ఈ అంశంపై స్పందించాలని ఎన్‌డీఏ మిత్రపక్షం, ఏపీ సీఎం చంద్రబాబును కోరారు. పరీక్ష నిర్వహణలో కేంద్రం పూర్తిగా విఫలమైందని, పేపర్లను లీక్ చేసిన వారికి మరణశిక్షతో సహా పరీక్షల అక్రమాలకు వ్యతిరేకంగా కఠినమైన చట్టాలను తీసుకురావాలని పిలుపునిచ్చారు.
"నీట్‌ను రద్దు చేసి, సంబంధిత రాష్ట్రాలు మెడికల్ అడ్మిషన్లు నిర్వహించాలి" అని డిమాండ్ చేస్తూ... EAMCETని దాదాపు 60 సంవత్సరాల పాటు ఎక్కువ సమస్యలు లేకుండా ఉమ్మడి ఆంధ్రప్రదేశ్‌లో నిర్వహించారని గుర్తు చేశారు. నీట్ నుంచి రాష్ట్రం బయటకు రావాలి. ఇందుకోసం రేవంత్ మంచి న్యాయవాదిని సుప్రీం కోర్టులో నియమించి రాష్ట్రం తరపున వాదనలు వినిపించాలి. రాష్టంలో ఎంసెట్ 60 ఏండ్లుగా బాగా జరిగింది.. అదే పద్ధతి మళ్ళీ రావాలి అని మాజీ ఎంపీ వినోద్ కుమార్ డిమాండ్ చేశారు.